لاهِيان جَي نہ چِتان, اَلا ! اُنِ مَ وِسِران

مَڙهِئو مَنجَهاران, جِيءُ منھنجو جَنِ سِين.

سُرُ سامُونڊِي

:ڏکين لفظن جون معنائون

لاهِيان = وساريان, ڀلجي وڃان

چِتان = دل تان, مَنَ تان

اَلا ! = آھَ ۽ دانھن - جيڪا اندر مان, دل مان پيڙا جي اظهار طور نڪري ٿي

اُنِ = انهن کان، پرين کان

مَ = نہ

وِسِران = وسري وڃان, دل تان لھي وڃان

مَڙهِئو = ڳنڍيو, جڙيو, هٿيڪو, ڦاٿل, سلھاڙيل

مَنجَهاران = اندران ئي اندران, لڪل, ڳجهہ ڳوھ ۾

جِيءُ = روح, ساھ, مَنُ, دل

؂ جيڪي منھنجي دل تان نٿا لھن, شال انهن کان ڪڏهن نہ وسري وڃان.

؂ منھنجو مَنُ اندران ئي اندران انهن سان ڳنڍيل آهي.

ڪي ماڻهون ڪڏهن ڀلجي بہ ياد ناهن ايندا ۽ ڪي وري وسرندا ئي ناهن, دل تان لھندا ئي ناهن.

هونئن ياد تہ انهن کي ڪبو آهي جيڪي وسري ويندا آهن پر جيڪي هر گهڙي, هر پل ۽ ساھ ساھ ۾ سمايل هجن سي ڀلا دل تان ڪيئن لھندا؟

هن وڻجاريءَ جي دل مان هڪ آھَ نڪري ٿي جنھن جو آواز ٻڌڻ ۾ نٿو اچي، هوءَ چئي ٿي؛

جيڪي پرين منھنجي دل تان ڪڏهن لٿا ئي ناهن. جن کي پل پل ۾ ۽ ساھ ساھ ۾ ساريندي رهان ٿي. شال اُهي بہ مون کي ايئين ئي ياد ڪندا هجن.

جن سان منھنجي دل جا, ساھ جا ۽ روح جا رشتا اندران اُڻيل, واڳيل, واڻيل, ڳنڍيل, سبيل ۽ سلهاڙيل آهن.

سي محبت جا نازڪ ۽ ڪومل جذبا پرينءَ سان سدائين جڙيل رهن.