وَانءُ وَڃِي وَائُٺِ، هِنئَڙَا ! مَاڳُ پِرِيُنِ جَو

چُمِئو چُمُ چَائُٺِ، هُوءَ جَا سَندِي سَڄَڻَين

سُرُ سَامُونڊي

:ڏکين لفظن جون معنائون

وَانءُ = وَڃُ

وَائُٺِ = جاچ ڪر، ڳول، تلاش ڪر، واءُ سواءُ لهہ

هِنئَڙا = او مَنَ، او دل

مَاڳُ = جڳهہ، هنڌ، رهڻ جي جاءِ

چَائُٺِ = چائٺ، دروازي جي هيٺين ڪاٺي

سَڄَڻَين = پرين جي، محبوبن جي، سڄڻن جي

~ او دل وڃ وڃي ڳول تہ محبوب ڪھڙي جاءِ تي ٿا رهن.

~ جڏهين ڳولي لھين ته چائٺ کي چميون ڏئي اچجان.

ٻاهرئين ملڪ ڪمائڻ لاءِ ويل هڪ پورهيت کي واپس اچڻ ۾ ڪيئي سال لنگهي ويا هن اڃان ناهي موٽيو.

سندس وني، محبوبه ڏاڍي بي چين، بي تاب ۽ بي قرار آهي. هوءَ روئي دل کي پئي چئي تہ ڪيڏو پريشان آهين پاڻ بہ ۽ منھنجو جيءُ به جهوري وڌو اٿئي.

ڀلا هينئن ڪر جو هتان ملڪ ملڪ ۽ شھر شھر وڃي محبوب کي ڳول تہ ڪيئن، ڪھڙين حالتن۾ ۽ ڪھڙي جاءِ تي ٿو رهي؟

جڏهين ڳولهي لھين تہ سندس خير سلامتيءَ سوڌو بيحد ادب سان سندس چائٺ کي چميون ڏئي اچجان.